Pada Sombah Nasi ada dua orang pembicara, yaitu :
orang yang pertama disebut "Nan Simpun Pokok" atau Tuan Rumah.
Tuan rumah yang mengadakan acara tersebut ada satu orang yang dituakan untuk mempersembahkan nasi agar nantinya ada yang menjawabnya agar para undangan tahu apa isi dari acara tersebut.
orang yang kedua disebut "Nan Manjawek" atau dapat juga disebut denan orang yang menjawab atau orang yang biasa memimpin acara tersebut. Biasa juga disebut dengan orang yang biasa menandingi orang pertama dalam penyampaian Nan Si Pokok. Nan Manjawek setelah menjawab pertanyaan Nan Si POkok lalu mengajak para undangan yang hadir untuk mencicip atau menikmati hidangan yang tersedia setalah Nan Si Pokok memberikan izin untuk dimakan.
Adapun bunyi dari Sombah Nasi tersebut diantaranya adalah sbb :
LAKI-LAKI (KE-1)
Assalamu’alaikum. Alaikumsalam kan jawabnya. Sapihak dek kami ko nan datang, nan sararak langkah dari rumah, nan sarayun lenggang di nan golong manuju ronah kampuang nanko.
Kampuang nan indak katinggian, dipagar bukik bakuliliang, disolo gunuang tungku tingo, tigo nan cukuik sajorangan.
Batang karambil linggayuran, rumpuiknyo gatil-gatilan, sawah bapiring di nan datar, ladang bapetak di nan lereng, cindo dusun betumpak-tumpak.
Maijau rono parolak mudo, jagung ma upiah bilang tangkai, bak tima bungo ladonyo.
Buah toruang ayun-ayunan, solo manyolo kacang panjang, mantimun mengarang buah. Mako kami turuikkanlah jalan nan panjang, jalan rayo titian batu, lobuah godang cindai tajelo. Lobuah godang cindai tajelo, bosiaknyo mipi bak dipipi, pasirnyo alui bak ditinting, batu bulek dusun basusun.
Pagar iduik baliak batimbal, pudiang ome sabola luar pudiang itam sabola dalam, jiluang babatang-batang mambelok lalu kahalaman.
Halaman nan indak lowe amek, malayah bungo saliguri, marumbai bungo tali-tali, bungo ijau sapajangkauan, tobik karono rondah-rondah.
Mako babunyilah bunyi-bunyian, marigih si bolang tandai, bakukuak kinantan suci, marentak balam bungo sawah.
Talengong kadalam parolak, cubodak lalaim baruak, kamuning sandaran alu, limau mani pantau kudu. Tobek nan bunta bakiambang, airnyo joniah ikannyo jinak, kulari babondong-bondong, bada sopek basiku-siku, bada puyu baridai ome, jariang malinte-linte juo.
Kinari bukan kinari sajo
Tumbuh sikojuik di ilalang
Kamari bukan kamaro sajo
Godang makosuik nan dijalang
Bodial jopun di Bangka Hulu
Panembak kapal diimuaro
Bari ampun ambo dek pangulu
Sambuiklah salam dek juaro
Adokah jauh nan kan dinanti atau kek dokek nan kan diimbau. Bilangan ala cukuik, langgaian lah datar. Sekian pertanyaan dari ambo.
PEREMPUAN ( KE-1 )
Sapanjang pahobaran Rky. tadi la susunan adat jo limbago. Kalau adat ado batangkai, pusako ado batampuak, kok undang ado batali, mangobek undak jo sakato, mangobek kato jo mufakat, itulah bonar nan dituruik.
Mamolah tadi Rky batanyo, adakah jauh nan kan dinanti, dokek nan kan di imbau, kok bilangan la gonok, langgaian la datar.
Jauah nan kan dinanti, dokek nan kan diimbau iyolah marapulai, ninik mamak, saroto urang nan banyak. Kinilah taduduak dirumah iko, bilangan la gonok, langgaian lah datar, mujur batimpo di nan elok, tuah la lokek di nan mulio usahlah ragu tontang itu.
Sakironyo ado kato sapata nan kan disobuik, rundiang sabuah nan kan tongah nan tarobik dibadan diri Rky kok titiak la bulia kami tampuang, maleleh la bisa kami palik kok bajalan la buliah diansuar kami manunggu tontang itu.
LAKI-LAKI ( KE-2 )
Mano Rky !
Somba sa ujud engan simpuh, saborek bungka nan piawai naroco lurui main daun. Indak ba sibah jo basisih bukan bahinggo jo babate.
Sombah kapado ninik mamak nan godang bbosar bantuah nan bapucuak sabonar bulek, baurek sabonar tunggang, dianjuang tinggi, diambal godang, sondi andiko dalam kampuang, tampuak jo tangkai di nagori.
Nan ibarat kayu godang ditongah kato :
Baurek limbago motan, babatang sondi andiko, badahan cupak jo gantang, barantiang bari jo babale, badaun rimbun dek adat, babungo mungkin jo patuik, babuah kato nan bonar.
Buliah baselo diureknyo, dapek basandar dibatangnyo, tinggi menunggawi, godang malindungi kan gantungan cupak nan duo. Partamo cupak usali kaduo cupak buatan.
Sampai kapado imam kotik, bilal maulana jo tuak ongku, tahu dihalal dengan haram, saroto ayah dengan batal, suluh bendang adat limbago.
Codiak jo tahu pandai, nan arif bijaksana, tahu diangin nan basilu, tahu di ombak nan basabuang, saroto dahan kan maipak atau kok rantiang nan kan mencucuak. Tahu diujung kato sampai, olun bakilek la bakalam bulan lan longkap tigo puluh. Takilek ikan dalam air, ikan takilek jalo tibo la tontu jantan batinonyo.
Saroto nan mudo pambimbing dunia, nan copek kaki ringan tangan, copek kaki indak panaruang, ringan tangan indak pamocah. Oso tarontang duo sudah, hatinyo suci bamuko joniah, tahu dimalu dengan sopan saroto raso jo pariso.
Torui pulo ka bundo kanduang, limpope rumah nan godang, sumarah didalam kampuang, hiasan dalam nagori. Kok iduik tompek banasar, mati tompek baniat, kan unduang-munduang ka madinah, kan payuang panji ka sirugo. Amban puruak aluang bunian urang nan duduk jo suketan.
Kalilawar di pulau rimbang
Anak ruso mati ta dobia
Kok awal mintak ditimbang
Kok doso ampun nan buliah
Bukan tambilang manggulampai
Tambilang panggali pakuburan
Bukan mambilang tando pandai
Mambilang untuk dipasombahkan
Dipanggang panggang digotok
Dikirai kirai dibakar
Tatangguak ikan gulamo
Dibilang bilang di otok
Dicurai curai dipapar
Dikombang sitombo lamo
Tatikalo maso dahulu, samusim maso saisuak, katiko langik besentak naik, bumi basentak turun, lawik sacampak jalo, tanah darek bolumlah lebar nan timbul gunung marapi.
Lorong di ninik muyang kito asal usul kalau dikaji didalam sitombo lamo sopiah bolahan tigo jurai. Sajurai ka banua ruhum banamo maharajo alif, sajurai ka bandar cino banamo maharajo dipang, sajurai ka pulau ome nangko banamo maharajo dirajo.
Pihak disutan maharajo dirajo taniat kadalam hati tacinto didalam kiro-kiro, balayiar enyo maso itu diate dondang nan sabuah cukuik jo coti bilang pandai.
Dek lamo dondang balayiar didalam lawik baharullah tampaklah api takijok-kijok. Gunung samaso itu diate puncak langgapuri banamo gunuang maharapi.
Senen sidangkak nan badangkang, saroto buayo putia daguak, dibukik pata patigo banamo bukik siguntang-guntang.
Dimano titiak palito
Dibaliak telong nan batali
Dari mano turun ninik kito
Io dipuncak gunuang marapi
Basentak turun kabawah la tibo diguguak ompang, senen ligundi nan baselo, senen bulo bataratak sabolun bakorong dengan kampuang, sabolum bakato jo nagori, maso badetar-detar upiah maso bacawan panarahan.
Dek lamo alam baputra urang batambah bakombang juo, kamanakan batambah banyak. Mako dibueklah sawah jo ladang makanan urang tigo luhak. Manolah luhak nan tigo, nak tuo luhak tanah datar, nan tongah luhak agam nan bonsu luhak limo puluh.
Dibuek adat dikarang undang disusun ciek-ciek dibuhul dikobek arek dipokukan katiang panjang.
Menurut bari balabe adat salilik gunung marapi, saedaran gunung pasaman, sajajaran sago jo singgalang saputran talang jo kurinci. Dari sirangkak nan badangkang, hinggo buayo putiah daguak, sampai kapintu rajo hilir durian ditakuak rajo. Sipisak sipisau anyuik, sialang balatank bosi, hingga air babaliak mudiak sampai ka ombak nan badobuar, rao jo mapak tunggul saroto gunung nan malintang. Pasisir bandar sapuluh hinggo taratak air hitam sampai ka tanjung samalida pucuak jambi sambilan lurah.
Jikok dikombang salebar alam
Jikok dibalum sabalum buku
Tontang iko basudah kelam
Sombah sahinggo iko dahulu
Tungkek galah omeh dirajo
Sitobal dibaliak papan
Koks alah tobatlah ambo
Bonar samo diamalkan
Barobah sadundun jo balam
Sikok katobek barulang mandi
Sombah sasusun dengan salam
Kok kato nak mintak dibunisi.
PEREMPUAN ( KE-2 )
Mandongaran pasobahan Rky. tako :
Gamontar sagalo batang tubuh, bakipe poluh kadado, bakojar dara kamuko, apo sobak dek bak itu : Madok kek diri ambo, ibarat biduk kociak jolong, sudah kalongkapan bolunlah cukuik, balayiar ditopi-topi.
Katongah takuik dek galombang, kepulau goriak dek buayo, lokek pituah Rky. juo :
Baburu ka padang datar
Dapek ruso bolang kaki
Dihalau ka tongah padang
Baguru ka palang ajar
Baru baguru guru la mati
Dislau surek surek la hilang
Baguncang bumi jo langik, barombak lawik sailan, bakumpul karang ka topi, kok karam ambo tontang itu.
Akan tatapi setelah ditimbang makna kato, disilau makna ragi, nyaotlah : nan kato wajib dijawab, gayuang wajib disambuik. Mano Rky.
Mintak ampun kabaisi rumah iko dan dibate dinding nan rencong, ditani rasuak nan lomah, nan disungkuik atok nan lebar.
Ninik mamak nan godang bosar batuah, urek tungang pucuak nan bulek diangori. Dahan rampak daun nan rimbun dipusako, putiak lobek buah nan ranum makanan urang saalamnyo.
Imam kotik : palito nan indak kunjuang padam, suluah nyalo masi didunia bendangnyo sampai ka akhirat. Nan duduaknyo bacaromin kitab, togaknyo rintang jo pituah.
Codiak pandai : urang nan arif cindokio, pandai ma agak ma agiahkan, kok runciang indak mancucuak, tajamnyo indak malukoi, pasak kungkung kunci nan toguah sumarak koto jo nagori.
Pisau dirawik ulu sonsang
Saruangnyo tore kayu jati
Ulunyo pangkal batang tomat
Diambiak paracik buluah
Takuik gontar ambo mambilang
Pangulu banyak nan sati
Tuak ongku banyak nan kiramat
Rang godang banyak nan batuah
Tatikalo pulau pangkek naik, katiko manusio pangkek turun. Pulai bapangkek naik maninggalkan ruo dengan buku, manusio bapangkek turun maninggalkan adat jo pisoko. Adat jo pusako bakulayat nan indak abi, basangketo nanindak sudah, kok putui tali dihadapan tali baule kabalakang, kok putui tali kabalakang, tali baule kahadapan. Itulah bakulayat abi basangketo budak. Loma ambal-ambal, cunduang tungkek menungkek, baitu adat iduik dalam nagori.
Supayo dapek dituruik rantau ditingkek tobiang. Rantau dituruik dengan undang, tobiang ditingkek dengan jonji.
Rantau nan kurang oso duo puluh dengan muaro. Dikarak nan manjerong di onau nan baduri. Gantang nan saratui gonok cupak nan duo bole tail.
Siak nagori bakorek kuku
Dikorek dengan sarawik
Sarawik pambola botuang tuo
Botuang tuo ambikkan lantai
Sajak nagori parompek suku
Tiap suku bori ba paruik
Banjar diagia batuo
Rumah dibori batangganai
Lobuah dibori baradat, topian dibori babaso, koto dirambah dengan koto jo mupakat. Lalu kabalai jo dubalang, tompek ma otok-otok sombah, boke mambilang-bilang pandai.
Balai batiang tore jilatang, nan ba poran siakar lundang, basondi garoman gajah. Gondang bagontang jangek tumo, tabuah bagual ikuar moncik. Anak adam 99, nan 90 manjadi jihin dengan setan, nan 9 manjadi anak cucu adam.
Kan apo guno anak cucu adam, untuk panurunkan lancang nan kuniang. Kan apo guno lancang nan kuniang untuk panuruik rantau nan duo tigo jurai.
Manolah rantau nan duo tigo jurai, partamo rantau kuantan, kaduo rantau kampar, katigo rantau batang hari.
Kuantan bukan bak kuantan kini, sungai korua dahulunyo. Jantan bukan panyogan bak jantan kini jantan paomua dahulunyo.
Kampar bukan bak kampar kini, sungai dore dahulunyo. Orang bukan pa lapar bak rang kini, orang babore dahulunyo.
Batang hari bukan bak batang hari kini, sungai jonia dahulunyo. Orang bukan pangari bak rang kini, orang barome dahulunyo. Ome baik tambang singingi, kalam diangkek lancuang dibuang samaso ome bakirai digambuik. Jiko maso dahulunyo : Barumah ka pambatang, bapuyuh panjang donguik, babalam tigo gayo, bakatitiaran sayung dalam. Kobau pingitan bawa rumah, jawi balonguar tonga padang, merpatinyo linduang bulan jo matohari. Itik jo anso tonang dimuaro. Kacang manjulai kabalango, pantau malumpek kasangkalan. Ome panjang panyontuang pintu, ome bulek palantiang anjiang, ome urai mangambu api, jiko maso dahulunyo. Baladang sabingkai tanggual salibunyo makan satahun pado maso dahulunyo juo. Maso kini indak basuo. kini ibarat menetek niro pinang, bak untuang induak ayam mangoke baru makan, dapek pagi habi potang.
Tongang iko kini pihak kapado diri ambo, topeklah bak pituah urang juo, saibarat urang pai manyumpik. Dicari katiko baik, dipilih maso yang elok, dipadoman galah salapan lalu bajalan masuak hutan.
Lah tibo dirimbo nan satumpak, dipandang hilir jo mudiak dilihat kiri jo kanan, tampaklah si burung nuri.
Inggok dikayu nan sabatang, sodang mengirai-ngirai sayok, sodang malope-lope payah. Lalu diambiak sumpitan godang saroto damak nan baipuh disumpik burung ateh dahan.
Satibo damak diate bagoluik jo bungo kombang, badundun jo buah ranum, babegar-begar jo awan. Mako samantaro buruang nak ka tangan, diurakkan kato sakutiko, ponek nak jadi parontian, potang anak jadi pamalaman. Sekian.
PIDATO SIRIH ( Penyerahan )
Talatak puntiang diulu
Dibawah kumpalan tali
Asal mulo koto kan daulu
Tigo limbago nan tarjadi
Partamo sombah manyombah, kaduo sirih jo pinang, katigo baso jo basi. Sombah manyombah dalam adat, tali ba tali undang-undang, tasobuik dimuluik mani,m tapakai dibaso baik.
Mulik mani calempong katok, baso baik guli dibibir dalam cupak nan piawai banamo adat sopan santan. Adat dilawik bajuru mudi, adat di sabuang bajuaro, adat di olek barajo jonang.
Kok dikaji tontang juru mudi, tahu diangin nan basilu, tahu diombak nan basabuang, pandai manjago pasang turun naik.
Kok dikaji tontang si juaro, tahu dituah sisik ayam, tahu digulang nan bakicuah, pandai manadah tampin taruah.
Kok dikaji tontangsi rajo jonang, tahu dikereng dengan gendeng, tahu dicaka dengan baik, pandai manjago lobiah dengan kurang.
Ramo-ramo tarobang malayang
Malayok ka koto tongah
Banyaknyo ompek puluh ompek
Endah carano bukan kapalang
Talotak ditongah-tongah
Dilingkuang urang nan rapek
Buruang si murak burang nuri
Sincirak ate pambatang
Sirih golak pinang manari
Malikek urang nan la datang
Lorong kepado caranonyo :
Carano banjar reno ali, buatan tukang koto godang, nan rimbun bungo kaliki, nan ranggah bungo kacubung, nan kunkun gagak kan inggok, nan lontiak olang bamain.
Satahun dipanggang bugi, samusim dilinggar cino, usahkan rotak rongikpun tido. Pihak kapado songkok carano, dalamak urang namokan, tonum banamo sialang suto, baukir babungo rampai, baturab ba bonag ome, baluki ba kelok paku, ragi nan samo baliak bala.
Baratui caromin dipinggir, batabuar kaco ditongah, kilek kumilek cahayonyo, sarupo bintang ate langik, bintang gujarah bakuliliang.
Pihak kapado nan sirihnyo : Sirih udang tampak ari, tampuaknyo bak kuku balam, gagangnyo bagai suaso, buah diambiak kan tanaman, batang diambiak kan tiruan. Satahun dalam panggilingan usahkan mosiak layuarpun tido.
Kononlah pulu dipinangnyo : Pinang si erak ero mani, tumbuhnyo dikidal rumah, tingginyo panjek-panjekan, rondahnyo jangkau-jangkauan, pucuak malepai awan putiah, satahun tupai dek mamanjek larang basuo jo buahnyo. Kok babuah sabijo duo, jatuahnyo bukan jatuah dek bapanjek, jatuah dek angin nan mandayu. Kok tasipuak bolah ompek, kok tapijak jadi sopah, baitu kan lombuik pinangnyo.
Salorong kapado digambirnyo : Gambir kuning sarupo dadiah, buatan puti sari lomak, maninyo tinggal dilidah, koleknyo tinggal dirangkungan, daun malayok kalawitan tibo dipulau batebaran.
Kok kunun dikunun dikapurnyo : Kapur putiah ombun bajano, dibauah jo air bungo, dipati jo pati santan, dikipe jo ambai-ambai. Dipalik jo jari mani, bakisar kajari tunjuak mambayang ka tapak tangan.
Sapalik sapuluh ome, sakodom sakati limo, larogo nan indak tarogoi, harogo satimbang jo nagori. Makanan anak rajo-rajo, pamainan anak puti-puti.
Pihak kapado tambakaunyo : tambakau alui ombun bajelo, bijonyo datang dari ruhum, pakirin si dayang dilawitan, dibao anak sutan bentan, diracik anak garagasi. Saeto panjang jaluarnyo, dijomur dibilik dalam, bapantang mosiak dek pane, mosiak dek ombun tongah malam.
Tanam sirih tanamlah udang
Tanam karokok dihalaman
Cabiak sirih gotoklah pinang
Gilinglah rokok pamainan tangan
Mudiakkan sawah dibondar
Hilirkan sawah taruko
Kok banyak bonar sirih dipasar
Sado iko dalam carano
Ayam putiah tarobang batali
Dilurah mangko maraok
Batoluar dirumpun soriak
Anaknyo turun salapan
Makanlah sirih pinang kami
Bapapatah mako disingkok
Baibarat mako dicabiak
Sopaknyo bari bajunjungan
PIDATO SIRIH ( Menerima )
Ruponyo sapanjang buah panitahan Rky nan tatabur kek nan banyak, nan talayang katongah-tongah, tatumpah kepada ambo. Didongar la rancak buni, dipandang la rancak rupo, la buntar sawah nan sapiring, la masak cindo padinyo. Tapi sungguhpun baitu dek padi indak satangkai, dek pipik indak saekor.
Dek padi indak satangkai masak nan indak sakali ambiak. Dek pipik bukan saekor tarobang nan indak sakali inggok. Mako kan ambo cubo marontang panjang, untuang taserakkan dijalo suto, kok untuang ikan nan buliah, kok indak ome tantangannyo.
Sairing balam jo barobah
Balam tarobang barobah mandi
Sairing salam dengan sombah
Salam datang sombah kambali
Kambali pado Rky mano : Rky
Anak ayam pandai baronang
Dapek kakinyo dek buayo
Duduk Rky jo batonang
Ambo kan mulai jo bicaro
Adopun sapanjang buah pamintahan Rky tako taserak nak ambo piliah, dipalik lalu dikampungkan. Kok anyuik nak ambo sonsong, disonsong lalu kahulunyo. Apolah ,,,,, pasombahan Rky
Dek caranolah katongah sarek barisi kalongkapan, mako malihek diate tupo, basiang diate tumbuh, tumbuh sarupo iko kini.
Sirih sacabiak mintak dikunyah, piang sagayiang mintak digotok, dipipil gambir dipalik kapur dek kami kan iyo baitu.
Takilek caromin di udaro
Jatuah kalawik batu karang
Hilang disembar dek buayo
Dek bonar sombah nan tibo
Lahir kapdao ambo surang
Batin kapado kami basamo
Kato wari kato bajawek, kato pusako kan batuluang, manuruik patatah jo patitih basuo pamainan adat.
Batonun kulindan suto
Sajalan ragi jo bonang
Suri dimano talataknyo
Layang malayang sombah tibo
Timpo batimpo solam datang
Titah ka ambo tahontamnyo
Kato tapogang kek pangulu, rundiang tasimpan ka dinan banyak. Awal jo akhir kok sapakat, lahir jo batin kok sasuai, tibo digayuang nan kan manyambuik, kato nan kan manjawab topek diambo tarabiknyo. Sungguhpun diambo tarobiknyo, nyato adat bahati sungguh, nyato pusako bainggiran . Bacupak talago ponuah, bagantang dimaharajo lelo, undang-undang maisi kondak.
Karono sobab dek baitu, kato iyo kato baturuik, kato indak kato mati, kato ontah kato tatogun. Dapeklah kato nan saiyo, kok bulek buliah digolekkan, picak dapek dilayangkan. Tibo kami dipambasokan, basapu laman nan sabidang, takuak pintu boke lalu, tabontang lapiak paradani, talatak sirih di carano, tando alamat putiah hati. Sonang bonar dalam hati dek malin indak tabacokan, dek tukang olun talukikan Allah lah sajo nan kan tahu.
Nan sakarang iko kini, tontang dek kami ini, olah sa iyo la sa lope, la satanai salotakkan, salolah sakojar untuk manarimo sirih Rky.
Tapi sungguhpun baitu, adopun masak sirih ko tigo parakato.
Partamo masak digagang, kaduo masak dimakan, katigo masak jo mufakat.
Nan dikatokan masak digagang :
Rono kuniang mangarisik, tampuak layuar daun la kucuik, dek ulek indak talomakkan, dek ulek indak tajalari.
Nyampang gugur manjalang tanah, jangan dicinto ka junjuang lai, tampan kan jadi sarok sajo, dakok nan saka sirih masak.
Tasobuik masak dimakan :
Sedang tampuak lai bagotah, maso daun lai baminyak, gilo dikijok pinang mudo, dirayu kapur jo gambir bararak lalu kacarano. Diupam manjadi satu, dikunyah ba merak bibir, kaleknyo tinggal dirangkungan, sarinyo naik kaparoman.
Kok dikatokan masak jo mufakat :
Olun dilihek ta pandang, la jole bangun sarawiknyo. Olun dikicok la taraso, la nyato lomak maninyo.
Salorong sirih Rky nan katongah, nyato bukan masak digagang, tapi indak pulo masak bamerah bibir. Isin jo rela dari Rky, sirih kan masak jo mufakat.
Olun bakilek la bakalam
Bulanlah gonok tigo puluah
Olun dilihek la dimakan
Raso la tibo dalam tubuh
Sobab dek baitu, kami ko banyak tadiri dari anak mudo matah nan indak tabiaso makan sirih. Nyampang sirih Rky kami cabiak, pinangnyo nan digotok, tontu indak lomak dimakan raso, indak rancak dipandang rupo. Sobab Rky kan mamandang kami bak pane dalam balukar, bak sicerek dipadang lalang, iko nan manggamang nan marusuah di kami. Sekian.
LAKI-LAKI ( KE-3 )
Maliek lurui batujuan, mamandang adat bajukalo. Kok lurui makanan titian, balabe makanan cubo, bontuak dimakan siku-siku.
Bungkal gonok manahan asah, hukum adial manahan bandiang, kato bonar manahan likek, banamo jopuik jo antar basandi arak jo iriang.
Arak iriang sapanjang jalan, dombak dombai sapanjang lobuah, ogung calempong jadi topuang, sorak jo sorai jadi bungo.
Salotui bodial pusako, pusako pangulu dinagari masuak ka karong kampuang Rky. Kini lah duduak diate rumah, duduak diruang rumah godang cukuik jo ninik dengan mamak saroto ipar dengan bisan, dilongkapi dek nan mudo matah.
Adopun kamudian daripado itu, sapihak dek kami nan datang ado mamogang pitaruah jo amanah. La tasuruah tasirayo untuk maantar mairiangkan marapulai naik karumah tanggonyo. Koma lah tibo disiko, tibo saroto jo adatnyo. Mahantar sampai kate rumah, baulur jawek ambo jo Rky, batumpu tapak dengan mamak.
Jikok dilihek si marapulai, dipandang anak daronyo, nan bak parmato jo pangerang, bak cincin pulang ka jari.
Surang ikan surang kulari
Samo sapukek kaduonyo
Surang bulan surang matohari
Samo bacahayo kaduonyo
Pandang-pandang lah dek Rky, daliak nan sako si marapulai. Urang mudo salendang dunia, duduak dikasuar kabosaran, dilingkung andam baliak bolak, longkok saroto pangiringnyo, ninik mamak samo didalam.
Mamakai baju bolah buluh, siba batansi timbal baliak, longan bakotak bonang makas, solo manyolo bonang ome. Bacawek bajamuar suto, bapondiang mako bapilin, takonak sokin pangidam. Lokek salowar kipe duo anggo, baturab duo ditongah, elo maelo pisak toruang, sajongkal pucuak robuangnyo.
Silaulah pulo anak daronyo : Nan bak padi sironiak jintan, pane tibo dilingkuik-lingkuik, hujan datang dikokar-kokar, sabijo horam dek ayam, la tande mako dikoke. Dipakaisilah si anak daro, dilokekkan baju suto barelun nan baukir bagajah meno, salendang kain kapunuik, obuaknyo katuar bakatuar. Badopak subang dipipi, badoriang golang ditangan, buatan tukang jolong pandai, kilek kumilek cahayonyo.
Dimaso sakarang kini, dihari sahari nangko, nak kami lotakkan boban nan bajunjuang, dibayiarkan utang tapabuek, disampaikan posan nan babao, padolah badan kan sesonyo, yaitu adok ka diri marapulai :
Nyampang kok tumbuh tongah rumah, kan jadi adat bijo baiklah hendaknyo, kan tungkek pamani jalan, kan kori pamagar adat, dalam adat baradat pulo.
Kok elok rotak tangannyo, baolah manukuak jo manambah, bao manyisik jo mambilai.
Kok elok rotak lidahnyo, kusuik baolah manyalosai, koruah baolah manjoniahi, ka mudiak nak sarontak galah, ka hilir sarongkuh dayung, bajalan samo ma iriang, baiyuran samo ma isi.
Salapi nan dari itu, ikolah ruponyo dimarapulai, raso menetek niro pinang onta barayir onta tido, nan bak alu patah patigo musim pabilo kan batawik.
Nan ibarat padi salibu, awak tumbuk musim talampau, urek bagantuang kajarami, rangkiang tinggi nan diadang. Mohon ditarimo dek mamak nan disiko, digonggam ditapak tangan, didalam adat jo pusako. Pulang bukan pulang kan baitu sajo, pulang paek pulang sigirik, pulang dengan karanjangnyo, posan indak baturuikkan, pitaruah indak bauni, maaf dipinta banyak-banyak.
PEREMPUAN ( KE-3 )
Salorong dibadan diri ambo nan bak ibarat urang mamanciang. Sodang dirintang air hilir, dalam dimabuak dek galombang, io dialun-alun buih, tali togang papung hilang kail disebar dek gurami.
Duduak tokojuik tukang panciang, kail putui boang lakusuik, kini manjolang bonang kakumpalan, kato dilotak dalam bari, bonar disimpan ka limbago, digonjuar rundiang sakutiko :
Dihari sehari nangko, dimaso sekarang kini :
Jikok disulam disuji-suji
Bakihin sangkuik kain bantal
Jikok dikonang dikaji-kaji
Disobuik asal jo muasal
Tatikalo maso dahulunyo, katiko bolun barbalun, bungo bolun bijipun bolun, niat tasimpan dalam hati, dihati ibu jo bapak.
Nan manjadi niat jo nosar, dimintak sungguh pado Allah, mamohon pado Illahi, kironyo dapek anak katurunan diwari nan kan manjawek, pusako nan kan batulung.
Kok buliah anak laki-laki : Boreklah cincin dikalingking, kan panjopuik dagang nan jauh, kan panyonsong panggilan tibo, pambangkik batang tarondam, palawan onjak rang didunio.
Kok buliah anak parompuan : Ibarat bungo dihalaman, limpope rumah nan godang, sumarak anjuang paranginan, acang-acang dalam nagori.
Mako tibolah maso katikonyo, nan bak bidal-bidal rang kini, bak andai-andai rang dahulu :
Ditobang batang balantak
Dikuduang sambilan jari
Barokat doa jo pintak
Masonyo Allah kan mambori
Buliah anak parompuan, sari lahir sari banamo, banamo : ………………………………….
Lalu ,,,,,,,,,,,,,,,,,,,,,,,,,,,,,,,,,,,,,,,,,, dijunjung bagai mangkuto, ditanai bagai gumalo, pamainan pagi jo potang.
Dibalikan subang jo golang
Bagonto ome balapi
Dari ketek kini la godang
Sampai manjadi anak gadi
Lalu ditunjuk diajari, dididik adat sopan santun, sacaro urang basuami. Umur cukuik bilangan sudah kini sirih lah patuik naik junjungan.
Mako tarobiklah niat jo nosar, hondak maminang jo mangacak mancari jdu tunangannyo. Dipikir-pikir dalam hati dipikir lalu dimonuangkan.
Pandang jauh dilayangkan, pandang dokek ditukikkan, nampak urang nan sapadan. Pandang lokek patuiklah sudah jatuah pilihan kek surang dinamokan si ………………………………………. rang namokan.
Urang barasal ba limbago, baso baik roman katuju, muluik rami paramah pulo.
Dek arok kek nan kan bulia, dek come dinan rugi mako ditingkeklah jonjang rang suku ………………………………. ditopiak malah bondualnyo.
Mamintak kek nan kan bulia, bakawaal kapado nan kiramat, mako Allah menggorakkan.
Batomu rue jo buku
Saukur batang kan junjungan
Pintak bulia kondak balaku
Sinen niat dilangsuangkan
Sapokat sagalo mamak, sasuai pulo jo baku, sa izin datuak pangulu, dihadirkan sopia bolahan, dihimpun karong kampuang. Nan jauh dilope turuik, nan dokek makanan himbau, lalu dijopuik si marapulai, jopuik saroto jo adatnyo.
La basulua matohari, bagalanggang mato yang banyak, kok olek la saponuah rumah, mangucap syukur ibu jo bapak dek utang ola tabayirkan.
Madok kapado anak daro : Ibarat robuang jolong mamboncuik, baumuar bilangan hari, godang disiram ombun malam, batang gompar sambilu indak.
Urek olun mancokam tanah, pucuak olun mandapek angin, ontak pabilo kan basogar.
Tapi kok untuang pamintaannyo, dek masin lidah junjungannyo, dek dingin tangan suaminyo, talakik robuang manjadi botuang.
Nyo baurek bagompal godang, nyo babatang barue-rue, badaun rimbun jo rampak. Tobiang diagak jangan nyo runtuah, lurah mamuji kan lindungan, samantang tinggi diawan, pucuaknyo runduak ka bumi, manyilau tanah menggodangkan.
Dihari sahari nangko, hari elok katiko baik, ombak tonang angin salosai, hujan toduah kabuik putih torang. Kinilah marawah nan baturiah, kinilah padam nan ba ukur. Tibo dijonji batoguhi, ikrar dimuliokan, mako timbang tarimo pado hari kini. Dek Rky lah manyorahkan kami tarimo jo hati suci, saroto muko nan joniah. Ketek tapak tangan, nyiru kami tampuangkan.
PENYERAHAN HIDANGAN
Sungguhpun Rky surang nan ta imbau dalam syariat jo hakikat atau disahir dengan bathin, samonyo didalam ampun.
Ampun jo maaf dipabanyak, suko jo rela dipalobia, dek kato banyak nan salah, dek rundiang banyak nan sosek, namun kita basifat gawal, Allah basifat qodim, jo parundiangan Rky dijalan. Apolah rundiangnyo.
Pihak dihari sahari iko, ontah hari ko nan elok, ontah katiko nan baik, sodang wakotu bungo kombang, ojuang balayir dimusimnyo, sawua tatogak angin tibo. Kok para undangan lah datang babondong, sipokok mananti jo basamo, jonang manatiang sangek suko, panawar sagalo ronggo hati.
Tumbuh sarupo iko kiniutang dek kami sipangkalan, iolah silang nan bapangkal karojo nan bapokok, disadiokan minum jo makan. Manolah ruponyo :
Malumpek sabolah kaki
Manganjak pasak diparau
Dihasilkan dek anak silaki-laki
Dimasak anak parompuan
Apolah namonyo : Nasi nan sasuok, gulai nan sa iri, air nan satitik. Nan bak pituah sagalo guru, adat sagalo datuak, adat limbago dalam olek mamakai sirajo jonang.
Tasobuik si rajo jonang : Tahu di ereng dengan gendeng, tahu dicaka dengan kaik, mato nyolang talingo nyariang manjago lobiah dengan kurang.
Dek pandai jonang manatiang, nan tahu digarik dengan raso, la tadongar piring babunyi, iyo didalam padapuran. Ola ditengok la dipandang cukuik barisi gale jo pinggan, togak badiri bujang jo jonang.
Tangan manatiang karuang selo, takonak kupiah dikapalo, lokek disamping tonunan arab bugi makasar rang namokan.
Manatiang nasi dengan gulai, jawek ba jawek cindonyo piriang, lego ba lego susunan gulai nan bak santano pajar tabantang. Tiko godang mamocah ruang, cangkir ketek babilang tangan, heranlah mato mamandangi umpamo ombak dilawiktan.
Pihak kapado susunanyo : Ditongah awan bajombo ditopi somuik baririang, nago bahoyak kinijo kanan barisi longkok kasadonyo.
Lembak nan dari padi itu, aluran nasi nan katongah, jiko diinok dimonuangkan asal mulo dahulunyo. Padi sironak rambun tulang, tumbuh dilereng kadataran, dijomur dek puti lindung bulan.
Hari pane jomuar balingkuik, hari hujan jomuar bakokar mosiak nan bukan alang-alang, kariang dek sinar pane potang. Lalu ditumbuk jomuar ka kincir, eten karonah bungo tanjuang iyo ka lurah sungai joniah.
Kalau ditengok cindonyo kincir, air godang bondar batumbuk nan umpamo si anak roda, bapaliang tingka batingka, bunyi alu sahut-sahutan solo tingkah calempong jao.
Jomuar ditumbuak pantang basokam, di indang mako baata, ditampi mako badodak, putiahnyo putiah bungo limau. Tatikalo maso dahulunyo : Sagonggam bora ditanak ponuahlah kanca jo kuali.
Nan litak makan dahulu solo manyolo urang mandatang namun nasi kan luak tido.
Nak hilir ka batang hari
Nak mudiak ka pauh rindang
Babelok jalan ka pariaman
Minumlah air nan ta isi
Makanlah nasi nan tahidang
Nak sonang hati sipangkalan
La basadokahan saisi rumah iko, adat lumpek basitumpu, concang balandasan, kato batiboon kek sianu batiboonnyo.
Salorong hidangan nan la katongah, elok susunannyo nan bak sirih, elok otoknyo nan bak gambir, gamak sodang kacak tabao, tampan ado lelo tapakai, indak bacacek jo bacotar, ola lah cukuik samparono.
Taniat dihati nak mamuji, taragak nak manyanjuangnyo, taraso kolu lidah manyobuik, pocah makrifat dek tuahnyo, jo bathin sajo disyukuri.
Apolah nan manjadi pinta jo pintu Rky tadi :
Air ta isi mintak diminum, nasi tahidang minta dimakan kapado kito nan duduk sa edaran, togak sapambatang di rumah iko.
Dek kami indak baapo de Rky :
Dipandang somak sarumpun buluah
Dirambah makonyo torang
Solang batanah kami lai omuah
Kok kunun mamakan nan tahidang
Tapi ulah dek togak baparintang, ulah dek duduak bapamainan, rintang dek baso si pangkalan, mako la sojuak kami sabolum minum, lah konyang sabolum makan.
Kini go kok kilek la barapi api, potui la badontum dontum, gabak dihulu la manopi kan ujan juo nyo kironyo. Kok iyo lai kan hujan nak diraoknyo kito sabalik, sarelon riak jo galombang, samo-samo kito makan. Apo sobab dek baitu :
Rang guguak poi ka pokan
Ma hilir manojum lobuah
Bakain basaruang batiak
Senen duduak kami kan makan
Bapikir kami kan batambuah
Kok baetong suok turun naik
Kok iyo kan samo makan :
Tobal bakabuik cindonyo asak
Urang mamorun rantiang aro
Kok iyo hidangan kan disantok
Tolong tunjukkan ikur kapalonyo
Dibaruah air katiagaan
Pimping sarumpun disubarang
Ambiak air basuahlah tangan
Kami mairing dibalakang
MINTAK DO’A
Ampunlah ambo dek pangulu, pangulu banyak nan sati, rang godang banyak nan batuah, bago marusuak tompek lalu nan dituju ka itu juo.
Tatikalo sumur kan dikali, samulo rantiang kan dipatah, pangulu badiri dinagari mambangun adat jo pusako, ,ma adokan bari jo babaleh, manyusun cupak dengan gantang.
Dek adat nan mamakai pusako tinggal maronggoi, cupak ta togak utang ma isi. Sungguhpun iyo nan sagonok itu, dek kami silang nan bapangkal, karojo nan bapokok, dicarilah bulek nan sagolek picak nan salayang.
Bulek la dapek digolekkan, picak la buliah dilayangkan, mako diambiak api saroto bakar kumonyan. Asok mandulang ka udaro, bau la tingal saisi rumah iko. Apola nan manjadi parmintaan kami dari siko :
1…………………. 2…………………… 3…………………. 4…………………… 5…………………………
Concang kan iyo sagaragai, kapal kan iyo salakuhan. Kini tampaknyo : Kok adat la tabatu intan kabawahnyo takosiah bulan. Syarak la ujudullah katenyo la ta ombun jantan.
Saukur hukum sasuai, sadundun adat jo agamo, adat kawi syarak lah lazim, undang manuruik dibalakang. Kini nan duo bola pihak nampaknyo : Bakobek jo akad nikah, babuhul moti ijab kabul, babuhul sintak jo bagian kan tanggal raso tak mungkin, ontah kok Allah manggorakkan. Kito mintak kan rasokinyo murah, umurnyo panjang, untuangnyo gantuang bagantuang bak aur dengan tobiang, bak tanggual luluh jo bingkai, bak kucing jatuah jo kombuik.
Ibarat urang manggale, taboli kek nan murah, tajual di nan mahal, sailir samudiak, saiyo sakato.
Dek sorik batomu larang basuo sarupo iko, takonang lo nan mati nan mati baru, nan indak takonang tacinto lai, nan dapek dek do’a sadokah sipokok nak samo disoru bulo. Kok borek dapek ringan, sompik dapek lapang. Jadi nampaknyo sakali marongkuh dayung duo tigo pulau talampau, sakali mambukak puro duo tingo utang lansai, nak mintak dibacokan.
MOHON PULANG
Jikok diagak dikonang konang, ditimbang sakali patuik, manakur ambo ka bumi, maningada ambo ka langik, dek kito kini la ompek adat nan ba pakai.
Partamo sombah manyombah, kaduo baso jo basi, katigo sirih jo pinang, ka ompek cukuik minum jo makan. Tontang minum jo makan, elok lenggang di ari pane, maradeso diparuik konyang, senen tabukak kiro-kiro.
Kok makan lah samparono konyang, minumlah samparono pueh. Kini air berensuik jadi darah, nasi baransuar jadi daging, syukur nikmat pado Allah, puji kek Rky tatonggoknyo.
Walau diawal kalam tadi, dekkato ambo nan sapatah, dek sombah ambo nan sabari, muluik ta tabur kek nan banyak, sombah taserak dinan rami.
Ruponyo ambo lai bakato di nan lai. Ado tarocak dilimbago, tatonggok dipusako. Manobang lai dipangkal, manjuluak lai dibuah, bakato lai dinan bonar, lokeklah tuah di nan banyak.
Tapi kok bakato kek nan tidak, malu ta tumpah pado ambo, arang tacuriang pado koniang, bakipe poluah kadado, bakojar darah kajantuang, buruak barito dinagori.
Kamujuran dek silang nan bapangkal namonyo : jauh disoru olah datang, dokek dipanggil olah tibo samo barhadir dirumah godang iko.
Kaujuran dek kami nan datang :
Datanglah dibukakkan pintu, duduklah dibontangkan lapiak, awi la batuangkan air, pun lapar la baidangkan nasi. Indak upek nan kan timbual, ontah kok puji nan kan bulia.
Jadi kami kini bak ibarat puruang, pipik ma Rky. Tarobang babegar diudaro, ba lunta-lunta jo kabuik, babentan-bentanjo awan, pueh malayang nyo malayok, sudah maninggi nyo marondah, tarobang kapadang ribu-ribu, iyo karimbo nan satumpak.
Sodang mamakan buah rumpuik, poruik konyang awipun tibo, lalu diisok ombun nan satitiak, sojuak nan bukan alang-alang bak pane ditimpo ronyai. Mambayang-bayang ka muko, mancayo ka utak bonak, sonang hati bukan kapalang, pariso maruang tubuh, sehat anggota katujuahnyo.
Dek lah sudah minum jo makan, makosuik bonar dalam hati, nak manjalang pinang sabatang, manuruik sarang batinggalkan, pulang ka asal dahulunyo.
Apo nan manjadi ka samparonoan sombah :
Riak la sampai ka tobiang, ruruik la sampai ka bakal, balayir la sampai ka pulau, bajalan la sampai ka bate.
Kok ta gonang la ba pambatang, mahilir la kamuaro, nan dimakosuik olah sampai, nan diamalkan pun lah pocah. Kok duduak nak ma urak selo, togak nak ma ayunkan langkah, bagojuar suruik ka pangkalan, sabondong pulang ka rumah masing-masing.
Izin jo rela kami mintak, mohon dilope jo hati suci, saroto muko nan joniah.
Si upiak siti rahinah
Mambao parian pulai poi
Guluang lapiak sapulah rima
Kami baliak hayo lai
PERBENDAHARAAN SOMBAH
Dek tinggi batang lamo kan roreh, dek panjang jalan lambek kan sampai, agak talalai ambo saketek.
Palupuh batang malapari
Pucuak manimpo akar jumbai
Dibao rang kan batipuh
Sungguhpun ambo togak badiri
Bukanlah urang codiak pandai
Ujudnyo duduak nan basimpuh
Kasa ombun kasa baludu
Salilik bajaik topi
Baturap jo bonang merah
La tasimpan dipagaran
Mintak ampun ambo ka pangulu
Nan saririk duduak ditopi
Saedaran madok ka tongah
Jo sombah dimuliokan
Pisau si rawik ulu sonsang
Saruangnyo tore kayu jati
Ulu pangkal batang tomat
Diambiak paracik buah
Takuik gontar ambo mambilang
Pangulu banyak nan sati
Tuah ongku banyak nan karamat
Rang godang banyak nan batuah
Mulonyo jalo diserakkan
Konai kulari nan bapolun
Mulonyo kato disombahkan
Manyusun jari mintak ampun
Mintak ampun ambo kapado ninik mamak. Nan godang bosar batuah, urek tunggang pucuak nan bulek dinagori. Dahan rampak daun nan rimbun dipusako.
Putiak lobek buah nan ranum, makanan urang sa alamnyo.
Kajirat tarobang ramo-ramo
Inggok mancokam lidi sogar
Badobuak jantuang ka tanah
Godang indak sobuik golar
Sombah jatuah ditongah-tongah
Kamano galah dirobahkan
Kasomak jalan batimbal
Konailah balam lalu mati
Kamano sombah disombahkan
Iyo ka pihak rang sipangkal
Rela jo salam mairingi
Dihari sahari iko, hari elok katiko baik, ombak tonang angin salosai, hujan toduah kabuikpun torang.
Kinilah marawah nan baturiah, kinilah padan nan baukur. Tibo dijonji batoguhi, ikrar dimuliokan, mako datang kami dek bajopuik. Ola tibo sapanjang adat la taduduak diate rumah nan gondang.
Rumah nan indak godang amek, rumah godang sambilan ruang, 99 banyak balobeknyo. Salojang kudo balari, sapokiak bundo maimbau, salitak kuciang malumpek, salayang kubin malayok.
Sondi banamo sondi adat, tiang banamo kan sandaran, pancuang turang olang kan tarobang, cucurannyo lobah kan inggok. Gonjong robuang mambucuik timah mamutiah diatehnyo.
Poran gambar si ular ngiang, batata bamego mego, ukir banamo batang padi, akar cino ragam tak sudah, rawik jadi tukang ta bunuh indak dapek maniru lai.
Lantai datar bak lantai kulik, dinding licin bak dinding kaco, ka ujuang sarambi popek katongah rajo babanding.
Rangkiangnyo 3 sajajar : Ditongah sibayau-bayau balarajuang sapanjang musim. Dikidal sitangkal lapar tompek batenggang urang kampuang. Ditopi si tinjau lawik panyapo dagang ta pasah.
Dek urang pihak disiko, urang babudi elok baso, dalam ba budi baradat pulo. Mako disonsongkanlah carano baso, ditinggalkan medan nan bapaneh manuju medan nan balinduang.
Dibasuah kaki jo cibuak godang, cibuaknyo rajo manonggok, salalai sasiram air sojuak la sampai ronggo hati.
Kan iyo dek elok tamu dibao naik, mulio undangan dibao duduk, la ta duduak ditongah rumah.
La duduak ditongah rumah diate lapiak ampar putiah, tilam basusun bakuliliang. Tikarnyo pandan manjulito, dianyam anak rando gadi, bapakai sakali bolun kinilah baru tabontangnyo.
Tak pueh mato mamandang, langgaman adat pariasan, talabuah tirai langik-langik, tirai suto panjang sambilan. Tiang bapaluik kain kuniang kasa ome ka omesan.
Mamandang lalu ka paserek cindo caromin lapi balapi, takonak dian jo palito, toranglah malam bak babasuah, kojar bakojar cahayonyo, bendang nan bukan alang-alang.
Kalau ditoruik jo padanan, tando dibaliak dikarisai, batomu adat nan bidaran nan mamang di nan pandai.
Barakik biduak talenggang. Kucuik jo saliguri.
Dalam rumik Rky batenggang, tando bamain akal budi. Salapi nan dari padi itu : adat dunio bale mambale, syariat palu mamalu, madok kek kami buli kini.
Pihak di kami ko nan datang, nan duduak ditomai lantai, salingkar bari ditopi, sabanjar bari ditongah, dek bacampuar tuo jo mudo, nan tuo kok nyo ta silap, nan mudo kok nyo tasosek mungkin basuo : Salah salah cotok malotiangkan, salah hawai ma ompekan, salah muluik mautangkan.
Takirai langkah kan masuak, ta kasar lenggang kaluar, tasingik budi di nan rami. Nyampang tasuo nan bak itu. Mambayir kami ponuah-ponuah, maminta kurang banyak-banyak.
Dilahir kami mohon maaf, dibathin ampun dimintak. Bunyi nak samo didongar, rupo nak samo dilihek, balabuah Rky jo bicaro, rundiang dikorek dibukunyo.
PERBENDAHARAAN ( Mengurung )
Hari lah laruik tongah malam, bulan tidak bintangpun tido, dek jauh nan kan dijalang, jarak panjang nan kan ditompuah, sodangkan biasonyo rimbo bajariang, padang bapanyongek, luak babuayo, iko nan manggamang marusua hati kami.
Jauh kok indak tajalang, tinggi kok indak tapanjek, kok indak sampai karumah masing-masing, bamalam kito di siko dulu.
Jiluang tumbuh di parak
Tumbuh sarumpun jo batang puar
Jonjang patah pintu bapasak
Kamano Rky kan kaluar
( MELEPASKAN )
Rabawa jo koto tinggi
Ranojun torui ikur koto
Koto sapatah palang ungkai
Jo muluik mani turun tanggo
Perbendaharaan
La ponek kami dek babansi
Bansi tasandar dipamatang
La pnek kami dek mananti
Mangapo Rky lambek datang
Dimalam salamam nangko
Ontah bulan ko nan torang
Ontah kok bintang nan mancayo
Godang ati indak tabado
Kok nan dinanti olah datang
Nan dijopuik la tabao
Ramo-ramo dipadalaman
Patah sayok tarobang baronti
Manukik ka dalam ladang
Usah lamo togak dilaman
Ambiak ciduak basuahlah kaki
Naik kate rumah godang
Kato nan indak mananti jawab, gayuang nan usah Rky sambuik, jo karojo sajo Rky uraikan.
Dek maaf godang faedah, dek rela godang manfaat, barela-rela sajo kito disiko. Kito lukuikkan katanah lakang, diayuikkan ka lawik lope.
SEKIAN
CATATAN :
mohon maaf, masih banyak kata dan kalimat yg belum tepat penulisannya, bahkan masih ada kalimat yang belum disempurnakan.
ucapan terima kasih kepada nara sumber Bpk. Sahari M Dia
Tidak ada komentar:
Posting Komentar